Sto Cavalo imprudente,
Un dì ch'el gera ardente,
Ga dito a la Cavala:
Sapi che te amo assae,
Ma no de amor de stala;
L'è de quel fin che mai se possa dar,
Sapi, Cavala cara,
Che te vogio stimar.
No aveva la Cavala mai pensà
A sto amor sublimà,
Ma da lu recordà
Nel cuor se ga svegià
Un sentimento a sta sublimità;
E ga dito: Sior sì, vogio provar
Cossa che xe un amante
Che me sapia stimar,
E voltada al Cavalo
L'à dito: No far falo,
Sastu, stimime assae,
Perchè mi son de quele
Che à da esser stimae.
Ogni zorno che insieme
O i magnava, o i trotava,
O pur che i se sguazzava,
Ela ghe dimandava:
Caro cavalo mio,
Me stimistu? E 'l Cavalo
Ghe rispondeva: Oh Dio!...
