In ocasion de la neve
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← El Pastizzo | Edission e fonte ▼ | Ottave balzane di Lodovico Ariosto → |
.jpg)
Geri sera per i trozi
De la neve zapegada,
E verzindome una strada,
Dove piè no gera stà;
Caminando come un omo,
Che nol sa dove ch'el vaga,
A passeto de lumaga.
Col sbrisson sempre obligà;
Fando i ponti, deventai
Senza bande nè scalini,
Proprio come i fantolini
Rampegandome a gaton;
Sempre in mezo a montagnole
De bisache de farina,
O de pana o de puina,
O de bale de coton;
E trovando fabricai
Per i campi e per le cale
Novi ponti, e de le scale
Dove mai no ghe n'è stà:
Col mio mocolo davanti
Che me fava compagnia,
Finalmente a casa mia
Grazie a Dio son arivà.
E co un gusto so andà in leto
Mai provà, no ve minchiono,
Nè go fato mai più un sono
Cussì longo nè più bon.
Eco quà, cara Contessa
De la storia de gersera
La pitura giusta e vera
La distinta relazion.
Ve la scrivo, ve la mando,
No per boria de poeta,
Ma perchè possiè star quieta
Che no go pericolà.
L'è un tributo a quela pena
Che per mi che andava in strada,
Gentilmente à dimostrada
El cuor vostro inzucarà.
Ma tocando un altro tasto
Sta matina stando in leto,
E pensando a quel caseto
Nato senza indiscrezion;
Ve assicuro che ò trovada
Assae comica la scena,
E che a mente più serena
Ò provà più confusion.
Tor un zioba per un luni!
L'è sta un falo tropo grosso:
Ma l'è fata; duro è l'osso,
Ma lo go za rosegà.
El xe sta come un chiapar
(Tra de mi giusto pensava)
Do colombi co una fava,
Caso raro che se dà.
Ah! Contessa benedeta,
Tirè un velo generoso.
Su sto anedoto curioso,
Su sto caso da Schieson.
Se volè che no i me fazza
Per sto esempio dei tabari,
E un invido a do disnari
Serva qualche altro scrocon.
.jpg)