Il Tutore
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
Un Tutor avea l'entrae
Del Pupilo consumae.
In giudizio a render conto
L'è chiamà circa sto ponto.
5El Pupilo, che à cità
Sto Tutor, cussì à parlà:
Mio sior pare m'à lassada
Una bela e grossa entrada;
El Tutor, ch'è qua presente,
10M'à ridoto senza gnente,
Fazzo istanza aciò me sia
La mia roba risarcìa.
El sior Giudice (parlando
Col Tutor) dise: Comando
15Presentar vu al mio Ministro
Ogni libro de registro
De l'Ussida, e de l'Entrada;
Che ogni cossa sia incontrada
Per poder con fondamento
20Dar giudizio in sto argomento.
Tuto inteso dal Tutor,
Trando a parte ogni rossor,
El s'è messo in zenochion
Dimandando compassion
25Con el dirghe: Ve protesto
Che altro libro no ò che questo
Che ve mostro: Ecolo quà.
E la boca el gh'à mostrà,
Sogiungendo, che l'Entrada
30Per de là gera passada;
Po voltandoghe el da drio,
Per de qua tuto è sortìo,
E se vede dal bilanzo
Che no gh'è gnente d'avanzo.
35Mal apena che l'avesse
Elo infati le braghesse
Per el capo soo più bon;
Tanto el gera crapulon:
Quando tuto è consumà,
40Adio conti: xe saldà.