Il Pensiere
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
Vado pensando, Nonola;
Quelo che Amor facesse
Quando ch'el te vedesse:
4No xelo un bel pensier?
Mi ghe scometarave
Ch'el restaria incantà;
E che dopo el dirave:
8Sta dona ghe xe qua?
Cussì el dirave, Nonola,
E po' dopo a bel belo
Quel mato de putelo
12Te vegnaria a basar
Prima la man, po' un brazzo,
E po' el farìa un sestin,
E po' dopo el furbazzo
16A pian, a pian pianin
L'anderia rampegandose
Più in su, più in suso ancora
Disendo: La inamora
20Custia l'istesso Amor.
E nol starìa più quieto,
Come i puteli fa,
El chiaparia un ochieto,
24La boca: e po' chi sa?
E ti po' disgustandote
Ti lo manazzaressi:
Putelo, ti diressi,
28Stà quieto, via sii bon.
E lu, come i puteli,
Mezzo mortificà,
In quei to bei caveli
32Tuto quanto imbautà,
Parlandote, pianzendote,
Tanti sesti el faria,
Chie alfin te sentiria
36Dirghe: Vien qua, baron.
Alora, co quel sesto
Che pol aver colù,
Svolando presto presto
40Ora zozo, ora su,
L'anderia cocolandote:
E ti ti ridaressi,
E ti deventaressi
44Più bela assae de lu.
Ma mi deventio mato?
Amor t'à da vardar?
No elo lu che t'à fato?
48Questo xe zavariar.
Ah sì son mato, Nonola,
E pur tropo lo vedo:
Figurite, che credo
52Che ti me vogi ben.
E pur te pregarìa,
Cara, benchè sia tal,
Lassarme in sta busìa;
56Za no la te fa mal.