I sorbeti

by Anton Maria Lamberti

3 I sorbeti
Apologo Anton Maria Lamberti XVIII Apologhi Indice:Raccolta di poesie in dialetto veneziano 1845.djvu Altra edizion: I Sorbeti (1817)

Anton Maria Lamberti

I sorbeti
Apologo

XVIII secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

Altra edizion: I Sorbeti (1817)

I SORBETI

Dimandando a un cortesan,
     Che ogni cossa ga per man,
     Che nei afari de sto mondo
     El procura andar al fondo,
     5La rason perchè l'amor
     Tante forme el sapia tor;
     Ma in un modo, che capir
     Nol se pol, nè definir,
     Sento a dirme: «vegnì qua,
     10Al cafè de la realtà,
     Un sorbeto bevarè
     E l'amor conoscerè. —
     — Vado, el dise: cossa ghe? —
     I risponde: — Framboè,
     15Cedro, ribes, maraschin,
     Moscatela, canelin,
     De la vissola, del persego,
     Del farsido, de la fragola: —
     — Basta; fragola, disemo,
     20E bevemo;
     E bevendo el dise lu:
     «Caro vu,
     Sti sorbeti che xe stai
     Dal regazzo nominai,
     25Xeli ognuno diferente? —
     — Che dimanda? no i se sente? —
     Sì, ma el corpo, o per dir megio,
     Quela cossa che i sostenta,
     Che deventa
     30La so essenza, in conclusion,
     Cossa xela? — L'è el limon. —
     — Ben; l'amor xe vanità,
     Xe interesse, xe pietà,
     L'è amicizia, platonismo,
     35Tenerezza, magnetismo;
     Ma l'essenza, in conclusion,
     Xela altro che limon? —
     Son restà come un minchion.