I due Orbi

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 107 modifica]
I DUE ORBI


Xe passà un morbinoso verso sera
     Per san Filipo-Giacomo,
     E sul ponte ghe gera
     Do' orbi che cercava la limosina.
     5El xe andà arente a quei,
     Disendoghe: Fradei,
     Tolè sto mezzo talaro,
     In pase dividevelo,
     E recitè el Rosario
     10Col Deus in adiutorio
     Per l'anime del santo Purgatorio.
Ga dito l'un e l'altro: Dio ghel merita.
     E dite ste Orazion i s'è pensai
     D'andar a l'Osteria, e presto i xe passai
     15A quela del Salvadego,
     E i s'à fato portar
     Da bever e magnar.
I xe vegnui po al ponto,
     Che più interessa, de pagar el conto:
     20E questo à dito a quelo:
     Vu, che avè el mezzo talaro, paghèlo:
     Ma l'altro alora ga risposto: vu
     Paghèlo, che se' quelo che l'à bù.

[p. 108 modifica]

     À replicà el secondo: Mi no posso
     25Pagar, quando se' vu quel che l'à scosso.
     Mi no go scosso gnente,
     À tornà a dir el primo francamente.
     E st'altro alora à dito: Se' un bricon
     Che me voria trufar. Vu, se' un ladron,
     30À sogiunto quel'altro, ma no mi.
     La và dita cussì,
     À tornà questo a quelo a replicar,
     E a forza de incalzar
     Ingiurie sora ingiurie i xe arivai
     35Che i se xe bastonai.
     Per meterghe de mezzo è corso l'Osto,
     E infati el gh'è riussio, ma a proprio costo;
     Che anca a lu gh'è tocae
     Oto o diese legnae.
40I Orbi à capio dopo
     Come quel tal li avea burlai pur tropo,
     Onde a l'Osto i ga dito: Pagheremo
     El primo dì che nu se vederemo,
     E l'Osto, omo discreto,
     45À ridesto a sta cossa e à tirà dreto.
          Mì no aprovo quel scherzo,
          Che in dano a ridondar vegna del terzo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=I_due_Orbi&oldid=69001"