I do Paesani e la Nuvola
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
«Vardè che fregola
De nuvolon!
(Diseva a Biasio
Barba Simon)
5Oimè, aspetemose
Un tempeston!
Che lampi oribili,
Che saeton!
Misericordia
10San Pantalon!
La biava al diavolo
Col formenton!
Schiao siori perseghi,
Gnanca un melon,
15Gnanca una nespola,
Gnanca un maron!
Quel'ua de zucaro
Là del stradon...
Bruzada in cenere...
20Tuto un carbon!
St'altra domenega
Che sagradon!
Magnemo i roveri
E quel teson!
25E po ancuo quindese...
Fora bubon,
E manzi e piegore
A tombolon:
Me scondo in camera,
30Scrivo al paron.
Fisso fisso vardando su in cielo
Coi so bravi ochialoni sul naso: —
De ste to profezie persuaso
Proprio gnente ma gnente no son;
35(Barba Basio risponde a Simon)
Anzi a dirtela, caro fradelo,
Sbrega pur, buta via el to lunario,
Che mi vedo a dretura el contrario.
Che tempesta! Quel bel nuvolon
40Porta piova, e po piova, minchion!
Oe, ti sa che xe vinti e più zorni
Che no casca una giozza da l'alto:
Un scravazzo xe un miel! Femo un salto.
Oh che biava! che bel formenton!
45Quanto fen! quanto vin! oh co bon!
Visto mai no avarà sti contorni
Un racolto più belo, più grasso:
Se faremo riconi: e che chiasso!
Ch'el ne slarga i graneri el paron,
50E ordinemose un bel canevon.
Ma qua barba Simon
Dando a Biasio un spenton: —
Va là, el dise, zucon,
Mi go otanta stagion;
55De sti nembi un milion
Ghe n'ò visto bufon:
Ma mai più quel cegion.
Veh che lampi! ahi che ton!
Ma za ti in conclusion
60Ti è una zuca, un melon.
B. Tuti vede coi so ochi...
S. Sì, ma i toi xe do fenochi...
B. Spero in Dio che ridarò...
S. Pianzaremo tuti do.
65Ma voi darte po del stolido,
B. E mi darte voi de l'aseno.
S. A chi?... B. a ti. S. ela a mi? mo no...
Chiapa intanto; intanto chiò...»
Qua scomenza una salva de pugni,
70De scalzae, de sgrafoni, de slepe...
Gore a meter de mezzo el piovan: —
«Via, sbragiando, via zo quele man,
«Oe Simon, Biasio, quietite — Oibò!»
El se beca el quartese col pro.
75Ma intanto che i se pesta
Dà su un colpo de vento,
Che se scoa in t'un mumento
Quel nuvolon coi lampi,
E adio piova e tempesta;
80El racolto dei campi,
Tal qual el gera, el resta.
Chi se vanta saver quel che Pandora
Tien drento del so vaso,
Squasi ogni dì, co la lo svoda fora,
85Se trova regalà tanto de naso.