I do Orsi
|
Edission original: |
Luigi Bampo, Miscellanea o trentacinque cose per trentacinque soldi, Treviso, Francesco Andreola, 1828 |
|
Fonte: |
Indice:Bampo - Miscellanea o trentacinque cose per trentacinque soldi, Treviso, Andreola, 1828.pdf |
| ← Il tresette al buio | Edission e fonte ▼ | La medicina inutile → |
Do orsi, che bisogna
Fusse de mal umor
(Li à visti coi so ochi un cazzador)
In t'un valon per caso s'à incontră,
E no i se varda apena
Che un contro l'altro furibondi i va.
L'impegno no me togo
De depenzar l'ardor, l'impeto, el fogo
Col qual i se malmena.
Bastarà che ve diga,
Che in manco de un minuto
I s'à magnà un co l'altro,
E xe scomparso tuto.—
Ma come se pol dar?
Me sento a domandar.—
L'è la cossa più facile del mondo;
El primo del secondo
À fatto un boconcin nel tempo istesso.
Che st'altro divorava el so nemigo.
Se ricusè de credar quel che digo,
No ve so cossa far; studiè Buffon,
El natural de l'orso conossè,
E ve persuadarė
Che de stupirse no ghe xe rason.