I colombi del Comun
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Eviva a la castradina | Edission e fonte ▼ | La canzon del congedà → |
Vu savè ben che i fìoi
vol tuto quel che i vede
tute le cosse i crede
che se ghe possa dar.
E ben a sto proposito
contarve vogio un caso
che ga tocà a Tomaso,
papà de Giacomin.
Un zorno de domenega
lu gera col putelo
a passegiar bel belo
la piazza su e zo.
A l'improviso Giacomo
ghe tira la velada
e in mezo de la strada
se mete a lagremar
dixendo: «Vogio subito,
» papà, portarme via
» do tre colombi: mia
» 'na razza vogio far!»
— Ma xestu mato, Giacomo?
— Tolendo una bestiola,
― una, ti vedi, sola,
— se ris-cia la preson;
— i xe colombi, vèdistu,
— che deve star in piazza,
― xe del Comun la razza,
— no se li pol tocar;
— e po no vogio, caspita,
— che ti me fassi sene,
— go le scarsele piene
― del to piagnucolar;
— so stufo de sta musica,
— ste lagreme, sti pianti,
— deboto ciamo i fanti
— e te farò ligar. —
» Eben», risponde Giacomo,
batendo i piè per tera,
» trovà mí go maniera
» per esser contentà:
» za ch'el Comun xe l'unico
» paron de queli osèi,
» vogio comprar coi schei
» un toco de Comun.»
E al ponte de Canonica
andando ancora adesso,
el fio se trova istesso
che pianze e bate i piè.