Eurila (1817)
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Sparpagnava i so balsami la note
Su l'aria e su la tera, e i cieli imensi,
Tuti de stele semenai, rideva
Su l'erbete e sui fiori. Alto, maestoso
5Silenzio dominava, e solo Eurila,
Za trapassada el cuor da dolce spina,
Lo rompeva col pianto. Ai tronchi, ai sassi,
Sola per sola, dal dolor strazzada,
De la capana su la porta, i moti
10Del so tenero cuor, cussì disendo,
Melodiosamente la spiegava:
Quei dì, vita de st'anima,
Dov'ei quei cari dì,
Che 'l mio dileto, e mì,
15Gerimo un solo?
Vien, ghe diseva, vissere,
Xe toi sti fiori e 'l pra,
Tuto quel che gh'è qua,
La vigna e 'l brolo.
20E lu, al so sen strenzendome:
Sorela de sto cuor,
Son qua, e con mi l'amor,
Sastu? xe sconto;
Più assae, più assae del netare
25Sti fiori, st'ua, sto miel,
De l'ambrosia del ciel
Più assae li conto.
Dov'ei quei dì de st'anima,
Quei cari e dolci dì?
30Ahi! che 'l so cuor per mì
Xe perso e morto.
Se el sono lusingandome
Me fava indormenzar,
E ogni senso restar
35Nel sono assorto,
Mai no dormiva st'anima,
Sempre sentiva in sen
La voce del mio ben
Che 'l soo chiamava.
40Da quela note oribile,
Tropo la sento, oimè!
Mai più co mi no xe
Quel che mi amava.
Amiga, amante, averzime,
45Lassime, ò sentio a dir,
Veder e po' morir
Quei ochi beli.
Tuto de bruma, vardime,
La testa son bagnà,
50Che la note à lassà
Sui mii caveli.
Chi è stà, chi è stà quel demone
Che m'à fato parlar?
Son spogia... in leto, e alzar...
55Vien n'altra sera,
Che cussì a scuro i sandali
Trovar no poderò,
Tuta me sporcherò
Coi pie per tera.
60Nega la boca, ah stolida!
Ma me strassina el cuor
Dove che xe el mio amor
Senza ritegno;
E l'ò sentio, sforzandome
65La porta a pian a pian,
E l'à messo la man
Tra legno e legno,
E 'l m'à tocà, e tocandome,
Tuta go bu a tremar,
70E nel fogo a giazzar
M'ò sentio tuta,
Ma n'ò savù risolverme
Parlar non ò possù,
No ò fenio mai più
75De star là muta.
Ahi! tropo tardi, misera,
Ahi! tropo tardi e stà,
Co la stangheta ò alzà
Perchè el vegnisse;
80Che indispetio, scampandone,
Disendome infedel,
Cambiando ambrosia in fiel
Da mi el sparisse.
Me xe cascada l'anema
85Ch'ò sentio el so parlar.
Me son messa a chiamar,
Ma senza fruto;
No m'à tegnù le tenebre,
L'onor no m'à tegnù,
90Solo ò cercà de lu
Sola per tuto.
Ma xe sta tuto inutile,
E xe passai tre dì
Ch'el mio dileto, e mì
95No xe più un solo.
Tre dì che nol considera
Più soi sti fiori, el pra,
Tuto quel che gh'è qua,
La vigna, el brolo.
100Che i fruti soi l'abomina,
El so late, el so miel;
Tre dì che per mi el Ciel
Xe sempre scuro.
Vu Ninfe, amanti tenere,
105Che forse me ascoltè,
Che me desfo, disè,
Sì, ve sconzuro:
Se mai volè conosserlo;
Missià col late e 'l vin
110Xe el viso, e de rubin
Xe i lavri beli;
I ochi xe do fiacole,
Nessun fissarli è bon,
Negri come 'l carbon
115Xe i so caveli;
La voce xe soavissima...
Ma za l'è conossù,
Se fra de mile e più
L'è l'omo eleto!
120Cerchèlo, o Ninfe tenere,
Cerchèlo, e se 'l trovè,
Che me desfo, disè,
Sto cuor in peto.
Piena el so sen de lagreme, e i caveli
125Sparsi qua e là sul colo e sul bel peto,
Cussì la se lagnava, aponto quando
El so dileto, che ascoltava sconto
Drio certe cane, za comosso e vinto
S'avea trato ai so pie. Mai cussì dolci
130Cole lagrime i basi è stai confusi,
Nè mortal à gustà delizie tante,
Nè amor s'à mai stupio, quanto osservando
Sta bela note, e sti felici amanti.