Epicedion
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Albe barbare | Edission e fonte ▼ | Pasqua granda → |
.jpg)
Omnis potentatus brevis vita. Languor prolixior gravat medicum.
Eccles. X, 11.
L'ULTIMA Volta che se semo visti
Gavemo ciacolà dei nostri guai,
Lu dei clienti che no paga mai
E mi de l'eresia dei democristi;
Che alora gò cità i Evangelisti
Indove certi porchi indemoniai,
Per comando de Cristo, i s'è negai
Che xe sta dei persuti el repulisti;
E lu el ga dito: ― I sopranaturali
Portenti, i xe miracoli de Dio
Che converte i eretichi mortali.
Però ghe digo el sentimento mio:
Vorlo dir ch'el paron de quei magliali,
E el porcaro anca lu s'à convertio?
El scherzava, se sa, perchè altrimenti
El gera un cristian vero e persuaso,
Che acostandose ai sete sacramenti
Lezeva la domenega el Travaso.
El gera spiritista ai so momenti,
Ma mi de questo no ghe fazzo caso,
Perchè xe un vizio d'omini eminenti,
Co' ghè un sporchezzo de petarghe el naso.
E adesso? Imagin santa crocifissa,
Cristo Gesù, che in barba a l'Iscariota
Te ga guario perfin l'emoroissa,
No me mandar per medego un idiota.
Basta un veterinario che capissa
E che distingua i cali da la gota!
Se me despiase, ciò! se me despiase?
Nol sente che me pianze la parola?
Nol sente con che rantego de gola
Cerco la rima per fenir la frase?
Adio! Tuto tramonta e tuto tase
Drento a st'anema mia deserta e sola!
No go più gnanca un can che me consola
Nè un'ora de speranza o un fià de pase!
Lu almanco el gà finio tranquilamente
Nel caldo del so nio, soto al so teto:
Tra i brazi e tra 'l dolor de la so zente;
Mi dovarò morir sora sto leto
Coi secondini e co' le guardie arente
E solo in brazzo a ti, Dio benedeto!