Elogio al cagar

Da Wikisource
Va a: navigasion, serca

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
50%.svg
Qualità del testo: sto testo el xe conpleto, ma el gà ancora bisogno de qualche sistemada. No xe stà indicà l'edission cartacea da cui vien el testo.
Elogio al cagar
XIX secolo
Edission e fonte ▼

Atenti, le suplico,
che voi se gh'è caso
andar un fià a pascolo
4sul monte Parnaso.

Materia vastissima
za trita e ritrita,
che a grandi e che a picoli
8conserva la vita.

Me spiego: in vernacolo
mi vogio tratar
sul gusto magnifico
12sul don del cagar.

Cercando convinserle
che in ogni dileto
che vol la so mercore
16par essar completo.

Za so securissimo
de aver el consenso
e che tuti me plauda
20ch’ i ga del bonsenso,

E chi che la mastega,
ossia ga talento,
convinti sul merito
24che ga l'argomento,

Dal mio breve esordio
metendose a l'erta
co gusto scoltandome
28i sta a boca averta.

Le sa che de gustibus
no bia disputar:
che elogio fa al mastego,
32e chi esalta el cagar!

Xe sempre dei omeni
diverso el progeto:
chi loda la causa
36e chi invessi l'efeto.

E mi co sti ultimi
me unisso, parchè
so certo, se esamino,
40che al mondo no ghè

Nè xe presumibile
se possa mai dar
un gusto più classico
44de quel del cagar:

Un gusto, disendola,
che fa che se viva
che solo la morte de tornelo
48la ga la esclusiva.

Sì!: ela xe l'unica,
nè altri ghe xe,
che diga a un preterito:
52no voi che caghè.

Nissun nissunissimo,
par quanto el sia bulo
el pol far da despota
56sul buso del culo!

Nissun pol oponarse
che in casa o che in strada
el fassa la so scarega
60co la l'è masorada!

Ma data l'ipotesi
che sensa cagar
sia mas-ci che femane
64podesse campar,

Nissun volontario,
so quà e ghe scometo,
nissun la renunzia
68faria a sto dileto:

Che xe inarivabile,
che vien tanto spesso,
che ga dei finomeni
72soto ogni riflesso.

Le feste più splendide,
i ciassi più bei,
xe cosse ridicole,
76xe afar da putei.

El balo, la musica
teatri, casini,
far corrar la bestia:
80xe gusti meschini;

El godar le mascare,
zirar par la piazza
vestrir da lustrissimi,
84andar a la cazza:

El far de le vincite,
l'aver bezzi assae,
el vedar le femene
88de vù inamorae,

Le cariche, i titoli,
no cava, ve zuro,
se andè a rifletendoghe
92un ragno dal muro.

E mi ve lo replico,
so pronto a provar,
che gnente no supera
96el ben del cagar.

Che alfin tuti termina
i gusti a sto mondo
in lagreme solide
100dal buso del tondo.

E che done e omeni,
chi poco chi tropo,
co ben se considera,
104contempla sto scopo.

Se veste na munega:
se fa dei bancheti;
ghe xe un sposalisio:
108se magna i confeti;

Finisse la fabrica:
se fa tratamento,
se nomena el paroco:
112se magna par sento;

Se vinse la cusa:
e, tope, el disnar,
la prole va capita:
116se pensa a magnar.

Magnar che se masora
in te le buele,
magnar che po senera
120i monghi e le ghele.

La merda xe el colige
de tuti i festini,
in merda se cambia
124le torte e i bodini;

Va sta in tel cantaro
le dindie, i caponi,
le cape, le ostreghe,
128i sgombri e i sturioni,

E co metamorfosi
finisse in quel liogo
le cure dotissime
132del più bravo cogo.

Nè par necessario,
rispeto a sto punto,
che co esempio pratico
136ve prova l'assunto,

Che sa no ghe xe dubio:
quel che ancuo magnè
doman, duro o tenaro,
140par sbrio lo caghè.

Se dunque da secoli
gavemo l'usanza
de qual sia la causa
144sgionfarse la pansa,

E se lege fisica,
mediante fermento,
el cibo manipola,
148reduse in escremento;

Xe cossa infalibile
no l'è un pregiudizio
che tuto ga termine
152nel far quel servizio;

Nè festa nè bagolo
se pol dir fegnio
se quel che se spapola
156no vien digerio:

E se dal preterito
la roba magnada,
o solida o tenara,
160no xe scaregada,

Provà co sta logica
che ogni dileto
se merda no'l genera
164no l'è mai completo.

Nissun pol negarmelo
che 'l don del cagar
el gusto più celebre
168se deve ciamar.

El don che, benefica,
a tuti assicura
sin l'ultimo anelito
172la madre natutra.

Che se qualche stolido
volesse azardar
de tor in ridicolo
176el me razonar,

Se qulche petegolo
dotà de imprudenza,
fasesse la critica
180a tanta eloquenza,

A sto visdemarmara,
a sto insulso pedante,
sta testa da selega,
184sto vero ignorante,

Col cuor ghe desidaro
che prima de sera
el buso infamissimo
188del cul se ghe sera,

Nè che'l trova fisici
capaci in alora,
par quanto che i furega
192de averzerlo ancora,

Sinchè circondandoghe
i fetidi umori
el crepa da martire
196in meso ai dolori:

Novelo Tiberio,
che un regno imponendo,
l'è morto fra i spasemi
200cagar no podendo.

El mondo xe infalibile,
el mondo xe belo
parchè ognun vario
204gavemo el servelo.

E tuti, credemelo,
insina da Adamo
chi grando, chi picolo
208ga un poco de ramo,

Se mi fusse scapolo
faria veramente
che muta, ch'estatega
212restasse la zente;

De comode de cantari
de quei da carteo
voria in modo armonico
216fodrarme el tineo,

Che fusse in ogn' angolo
quà e là sparpagnai
dei stronsi grandissimi
220par forsa cagai,

E merde col crostolo
de picole de grande
o dure, de tenare,
224da tute le bande,

Molae da preteriti
i più risercai
de done, de omeni
228de cani, de gati

De cavre, de piegore
de mussi, de tori
che dasse spetacolo
232de tuti i colori.

E po a la me tavola
vorave invitar
la zente, obligandola
236là dentro a cagar:

El culo netandose
indove che i vol:
o in la tovagia,
240o in tel tovagiol!

Col pato inviolabile
che se i magna a maca,
sia d'ogni so dialogo
244sogeta la caca.

Voria ne le camare
atorno dei muri
a modo piramide
248i stronsi più duri.

E sora dei mobili,
in te le cassele,
fornie col so crostolo
252le merde più bele;

Vorave nel portego
la mercore a sguasso:
coverto de petole
256vorave el tarasso;

E a taco del comodo
dabasso in latrina
smerdada col scogolo
260voria la cusina.

Talchè ne la caneva
insin la sofita
coresse perpetua
264l'essensa gradita.

Oh! gusto dolcissimo
più assae de l'amar!
Oh! cari quei premiti
268forieri al cagar!

Mi posso asserirvelo
per cossa sicura,
el xe el ben massimo
272che da la natura;

L'è 'l solo, l'è unico
solevo ai mortai
che sia inseparabile
276dai beni e dai mai,

L'è un ben che xe proprio
dei bei, dei bruti,
dei richi, dei povari,
280l'è un gusto de tuti!

Un dì discorendola
co vari signori,
dei quai bon numaro
284i gera dotori,

Da un medeco fisico
a dir go sentìo
che va fora l'anema
288dal bus del dadrio:

Mi za so incredulo
dei gran leterati,
parchè i casca in buzare,
292i xe mezi mati;

Ma se mai gavessimo
cussì da finir,
che gusto, me imagino,
296cagando morir!

La vita dei omeni
sarave in sto caso
ridota longhissima
300a forsa de naso,

E quei che ga el pregio
de averlo assae grando
i saria sicurissimi
304de no sta mai de bando.

Ghe xe in sto elogio,
o ben o mal,
o granda o picola,
308la so moral:

Ma vista l'indole
de l'argomento
mi de catarghela
312no me cimento,

Ateso el genere
de la materia,
par cui l'analese
316xe tropo seria,

Nè torghe el merito
voria in sto caso
a tanti chimici
320che ga bon naso.