El zarlatan (Giovanni Battista Bada)
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Ghe gera un zarlatan che nel contar
Istorie dei so viagi avea el difeto,
De falope grandissime sbarar,
4Che gnanca no se trova in Riciardeto;
L'à pensà de volerse moderar,
Ordinando al so servo per sto ogeto,
Che quando el lo sentisse a esagerar
8Ghe tirasse el gaban; onde in efeto
Disendo un dì d'aver trovà un lion
Che gaveva una coa longa tre mia,
11El servitor ga dà presto un tiron;
E lu à calà d'un mio, e andando via
Un tirando, un calando, in conclusion,
14Che l'era senza coa ghe sovegnia.
Sto tiron ghe voria,
Amigo, anca per vu quando parlè,
17Perchè altro mai che slape no contè.