El paron
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El senser d'afitanze | Edission e fonte ▼ | El codice d'un omo de spirito → |
EL PARON
Ve posso assicurar che a casa mia
Tuti xe zero e che so mi el paron:
Per questo vado solo in pescaria
E torno su col granzo e col melon.
Corer spesso me toca a l’ostaria
Co la botiglia soto el veladon;
E quando 'l pozzo segna carestia
Me vedè co la fiasca al fontanon.
Nissun altro che mi vanta el dirito
De firmar conti, letere, contrati,
E pagar el testatego e l’afito:
E quando mia mugier co la massera
Se sgrafa i oci e manda in aria i piati,
So qua mi.... per le spese de la guera.