Ve par gnente sta vita de levrier?
Sto semenar busie più che parole?
Spesso de bando consumar le siole
E fruar tuti i feri del mistier?
Spassizar tra i garofoli e le viole
Per usmar1 ogni buso del quartier;
E passar da la caneva2 al graner
Fra le babe che petena la prole?
Romperse i corni soto i luminai?3
Fra le bote sporcarse e fra le pile,
Impenirse de polvere el gaban?
Là, come cani, i pulesi danai
Scorlarse in zito, e sofegar la bile
Spetando el ragno co la felpa in man?
