El medego da buganze
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← Spiritismo | Edission e fonte ▼ | La terapia del zorno → |
EL MEDEGO DA BUGANZE
Questo xe quel famoso zarlatan
Che vanta un colpo d'ocio che no fala,
Metendoghe le pape a un membro san,
Mandando a l'ospeal chi ga la bala.
Che ve core su e zo per ogni scala
Benchè al so leto no lo vogia un can,
O stravacà nel carozzon de gala
Passa in trionfo col so libro in man.
Che se fa co i goleti rimarcar,
Col ton da Dulcamara, co l'imbrogio,
E sgionfando i zornai se fa lustrar.
Che no à mai tempo de vardar un sfogio,
Ma sempre ghe ne avanza per babar,
E per slongarve i pesi del relogio.