El gobo

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 62 modifica]
EL GOBO.


I.


     L'era lì fermo sul canton del gheto
che el sigava: «Cerini! Fulminanti!»
Co la testa cassada nel coleto
e la botega a pingolon davanti.

     Gobo quà, gobo là, gobo, gobeto,
siga i mostri, stigadi da i birbanti,
e lu, sconto de drio de un portegheto,
el li manda a l'inferno tuti quanti!

     Che quando un poro can nasse segnado,
no i lo ciama col nome de bateso,
ma gobo, sturpio, monco, mal taiado...

     Invesse se l'è un sior come che va,
el pol èssar più storto de un pontèso,1
guai la madona a dir la verità!

[p. 63 modifica]


II.


     A mesanote i sera la locanda
e bastiemando el gobo el se rampéga
sora i scalini de una ciesa granda,
co la fame che 'l stomego ghe sbrega.2

     Lu no 'l g'à leto, lu no 'l g'à una branda,3
nè un paion, nè un cussin, nè una carega,4
ma el va zo co la testa da una banda
su i scatolini de la so botega;

     e sognando ghe par, che da i cerini,
salta su, co la facia invernisada,
de le done in camisa a farghe inchini;

     che lo invida a balar qualche matada,
che ghe tasta la goba co i dentini...
E i è le done che lu el vende in strada!

[p. 64 modifica]


III.


     Una ghe parla: gobo, come vala?
E lu el risponde: La va male, e lei?
Questa quà su i zenoci la ghe bala
e lu pronto el ghe petena i cavei.

     St'altra, dobada de una tenda giala,
la ghe dise, tocandolo co i dei:
te pesa sto fagoto su la spala?
E lu da gnagno: Bei cerini, bei!

     Oh che sogni! Corgà5 sora i scalini,
forsi stanote la ghe passa lissia,
parchè guai se lo cata i questurini...

     Sangue, i è quà! Par colpa de la luna,
i lo ciapa, i lo scurla,6 i lo desmissia...
Gnanca i gobi a sto mondo g'à fortuna!



Note
  1. pontèso: palo di sostegno alla vite.
  2. sbrega: lacera
  3. branda: letto volante
  4. carèga: sedia.
  5. corgà: coricato
  6. i lo scurla: lo scuotono.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_gobo&oldid=70384"