El garanghelo
|
Edission original: |
Jacopo Vincenzo Foscarini, Per le nozze Medin-Maniago, Versi in dialetto veneziano, Venezia, dalla tipografia di G.B. Merlo, 1839 |
|
Fonte: |
| ← El passegio | Edission e fonte ▼ | La straleca → |
EL GARANGHELO
Ohe! fa tardi, Nina, andemo
Che a la riva ghè el batelo,
Nu saressimo a Castelo,
E qualcossa anca più in là.
Se ti avessi fato presto
A vestirte, a petenarte
Senza usar de tuta l'arte
Che la moda t'à insegnà.
Per andar a spasso a Lio
No ghe vol tanti chinchiezzi,
La belezza no val bezzi
Co licada la ve par.
No far come ste signore
Che se tenze carne e pelo,
La belezza da batelo
No xe solita a inganar.