El fermacarte
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Un disnar in çità | Edission e fonte ▼ | El fogolar del sono → |
Me son fato un fermacarte
co una testa da omo morto;
e l'è lì, col muso storto,
che 'l fa guardia a le me carte...
Questa quà, l’è una malissia
da birbante, ma sicura:
che la serva g'à paura
e le carte no la missia.1
Çerte volte, mi la guardo
quela testa; ela me sgogna2
come a dir: no g’ò vargogna,
come dir: no g'ò riguardo;
e la ride, con quel senso
de ci scolta e no ve crede:
ghe scometo che la vede
tuto quanto quel che penso.
E me par che la discora:
«Mi no g'ò i to cavei neri,
nè i to oci, nè pensieri
par la bionda o par la mora;
ma me par, che d'altra parte,
tolto via quel fià de pele
che ghe piase a le putele,
Peuh!... Gh'è un altro, fermacarte!»
- Note