El Visir e l'Anelo
|
Edission original: |
Francesco Gritti, Poesie di Francesco Gritti in dialetto veneziano, Terza edizione ricorretta e accresciuta, Venezia, G. Missaglia, 1824 |
|
Fonte: |
Indice:Poesie di Francesco Gritti in dialetto veneziano.djvu |
| Edission e fonte ▼ |
1Al Cairo, circa setant'ani fa,
Kalù bizaro, prodigo Bassà
D'una de quele coe che val per tre,
À fato un dì chiamar per el lachè
El so prete de casa, un bon Dervì,
Savio, prudente, e 'l g'ha dito cussì:
Belchù, varda sta gema: te dirò
Per chi l'ha da servir. Za de ti go
Prove che basta: tiola donca su,
La deposito in man de la virtù.
2Queste xe borse piene de oro. Va,
Zira l'Asia, l'Europa, le cità,
Le vile, i borghi, le moschee, i cafè,
E pesa le pazzie quante le xe;
E co ti trovi (giudica pur ti)
El mato più solene de sti dì,
Faghe a l'uso oriental un prostinò,
Metighe in deo l'anelo, e dighe: tiò,
Questo è 'l tributo del Bassà Kalù;
E in quatr'ani te aspeto. Adio Belchù.
3Belchù tol su l'anelo e 'l so casnà,
El se mete a viazar, e presto el sa
Che, compresi i filosofi coi re,
Dei mati al mondo, graziadio, ghe n'è;
Cervei bislachi senza ti nè mi,
Logiche gravi de chichirichì,
Teste che fuma tre fia cinque do,
Spiriti incoronai de qui pro quo;
E gh'è per tuto inzegni a cul in su
Che crede el noi sinonimo del tu.
4Tra i vovi a corbe de l'umanità
A scieglier mo te vòi! come se fà?
Se mentre sora d'un la man portè,
Un più belo e più grosso ghe ne ochiè.
Belchù studia, confronta, invoca Alì,
Ma cossa serve se nol sa po a chi
Consegnar quel anelo? a San Malò
L'aveva trovà un tomo... e squasi... Oibò
(Ghe dise el cuor) a Roma, o in Calicù
Ghe n'è forsi un più belo de costù.
5Sempre in dubio el Dervì, mortificà,
Tuta l'Asia e l'Europa l'ha zirà;
L'è tornà a Douvre, l'è tornà a Calè...
L'anelo... sempre el lo ga in man. Ma chè?
Tra una fola d'eroi, de beaux-esprits,
Come a un solo mo dir: Tiens, mon ami?
Per no incandirse l'anema e i cocò,
Oh basta, el dise, che ghe pensa el Bo,
Tornerò a casa, cercarò tra nu.
L'è a Venezia, el s'imbarca per Corfù.
6Mati a Venezia nol ghe n'ha trovà,
Ma dei Savj a fioroni in quantità.
Co l'è a Costantinopoli (vardè
Quando che i dise) mentre el beve un tè
Corer el vede el popolo, i spahì,
I Gianizzeri, Agà, Cadì, Muftì
Verso el Seragio, e tuti ziga... Hallò
Sala-mikula-ke-Al-Koranò:
Che vol dir ne l'idioma del Talmù;
Palme, allori a chi c'è, corna a chi fu.
7Mosso da natural curiosità,
El domanda: Gh'è qualche novità?
Ghe risponde un Iman: No lo vedè?
Le solite miserie che savè;
I ha strangolà el Visir Macmu-Kepì,
E tuti fa bacan, sentiu? sentì!
El Sultan ama el popolo, e però
El ghe regala spesso sto gatò. —
Belchù.- Nissun vorà Visir dopo Macmù! —
Iman.- Eco là el sucessor; vedeu colù?
8El buta l'ochio dove i g'ha mostrà,
E saveu mo chi el vede? el so Bassà,
Proprio Kalù. Sorpreso el dise... Oh v'è!
Xelo, o no xelo lu? l'è lu a la fe.
Kalù lo riconosse... — Adio, bondì,
Ti è tornà, sì... e l'anelo?... presto dì. —
Belchù.- Visir ve fazzo prima un prostinò. —
Kalù.- Vòi saver de l'anelo... el gastu, o no? —
Belchù.- Eco l'anelo... no cerchè de più,
Fe a mio modo, Visir, tegnìlo vu.