El Tornidor
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
Un Tornidor famoso tabacon,
Che magnava el tabaco come el pan;
Ma sempre a scroca, e senza discrezion.
À messo su botega un dì a Muran
5In fazza d'un spicier cortesanon,
Che butava le bave come un can,
Perchè sto bon vicina ghe fava guera;
Continuamente a la so tabachiera.
Dala matina in fin la scura note
10El povero spicier gera assedià
Dal nostro Tornidor seca balote,
Ch'ogni minuto, e mezzo gera là;
Nol dava sul so torno diese bote,
Ch'el tornava in lezion come, che va,
15Tanto, che'l bon spicier cola so spatola
No fava, che zontar tabaco in scatola.
Coss'ogio mai da far? el dise un dì,
Parlando col fachin, che tamisava:
Col Tornidor la seguita cussì,
20Bisogna, che mua posto, e che me cava:
El m'à svodà sto vaso in quatro dì,
Ch'al manco un bon meseto el me bastava;
Ma salta su el fachin, gnente, paron,
Ve leverò da torno sto moscon.
25Basta, che permetè, mi vago in bota
A maroni de gato in magazen,
Li meto in forno in fin che i se biscota,
E dopo in tel morter li pesto ben;
Ghe unisso del tabaco ala paulota,
30Del senape, del pevere, e del cren,
E fazzo un per de lire de tabaco
Da consolarghe el naso a quel bislaco.
Mo bravo el me Martin! va ben assae,
Dise el paron, va chè mi no vedo l'ora
35De liberarmelo dele gran secae
Che me dà quel canagia bruta, e fora:
El bon fachin va, e torna in do svolae,
In poco più voi dir d'una mezzora,
Con quel tabaco de stupendo odor,
40Per farghe un regaleto al Tornidor.
Fratanto el galantomo se avicina,
Disendoghe al specier: per carità
La prego d'una mezza presetina,
Chè'l mio povero naso xe arsirà.
45Aspeta sì, canagia beretina!
Dise el spicier sot'ose, e po el ghe dà
Quel tabaco, col pato, chè mai più
Nol vaga in vita a tabacar da lu.
Contento el va al so torno, e col xe là
50La polvere prencipia a far l'efeto:
El chiama so mugier; Cate, vien quà,
Pareme via sto gato maledeto,
Chè in qualche logo certo l'à isporcà,
O almanco, almanco l'à tirà un gran peto;
55Ma la dona ghe dise: vu sè mato,
In casa nostra no ghè stà mai gato.
No ti ga naso, sempia! el salta su,
Varda per tuto, chè senz'altro el ghè...
Senti, che peste! mi no posso più,
60Se no gavesse po sto bon rapè!
La dona ghe responde: vardè vu,
Chè mi ve torno, a dir, che no'l ghe xe;
Ma lu continua: varda ben, talpona!
Chè questo è odor da... meola bela, e bona;
65Sta sonica à durà per un pezzeto,
In fin che quel tabaco è stà fenio;
Ma el nostro Tornidor, vero cucheto,
D'esser sta minchionà mai l'à capio:
El se tegniva ben el naso stretto,
70E ogni tanto el diseva: pofarsbrio!
Che peste buscarona xe mai questa,
Che no me lassa star gnanca la festa!
Ma fenisse el tabaco, e 'l tristo odor
Insieme col tabaco l'abandona;
75Sorpreso de sto fato el Tornidor
Se porta in bota dala so parona,
Disendoghe: el delirio traditor,
Che no me ne vol dar una de bona,
M'à messo soto el naso el so dadrio
80In fin ch'el bon tabaco è sta fenio.
Scroconi temerari quanti sè,
Che ghe somegia al povero burlà
Mantegnui de tabaco, de cafè,
De vin, e... che soi mi? dala cità,
85Da bravi, da sta favola imparè
A tratar c'un pocheta de onestà;
Altrimenti, per diana! che dai, dai,
Un zorno, come lu, sarè burlai.