El Lion e 'l Mossato (1834)
|
Edission original: |
Giovanni Battista Casti, Scherzi poetici di vari celebri autori italiani e veneziani raccolti da G.B.C., Venezia, Tip. Molinari, 1834 |
|
Fonte: |
Indice:Scherzi poetici di vari celebri autori italiani e veneziani.djvu |
| Edission e fonte ▼ |
Spassisava gravemente
Un lion de casa vechia,
Uo mossato ghe va arente,
El ghe dise in t'una rechia:
»Che siroco sfondradon!
»Uh che caldo, sior paron!
Con un cefo da Megera
Ghe risponde so zelenza:
»Escremento de la tera,
Chi t'ha dà sta confidenza?
Vil insetto! .. Chi è de là?
Cassè via custù de quà.
St'improperi, oh dio, al mossato
Fa vegnir mo su la stizza.
El ghe dise: xestu mato?
A mi ingiurie! dime, schizza?...
Se me meto... sapi ben
Ch'ogni bissa à el so velen:
Gastu boria, di', per questa
Celeghera sgrendenada?
Ti me mostri la mascela
Po le sgrinfie?... l'è falada.
Da volatile d'onor
Te go giusto... ma de cuor.
Varda el toro... xelo grando?
I so corni no ghe giova,
Se lo vegno tormentando
El me cerca e nol me trova;
Fa el to conto... come?... no?
Ben... mio danno!... proverò.
Dito questo, beca e via;
E po torna, beca e svola;
El ghe fa una becaria
Dal bonigolo a la gola;
Per le rechie el ghe va su;
Beca e sbigna, nol gh'è più.
El ghe sbalza dai zenochi
Al barbusso, a le zenzive;
El ghe ponse el naso, i occhi
E le parti le più vive;
Fin per farlo desperar
Ghe và el sfinter a becar.
El leon che ga presenti
Tanti eroi de casa soa;
Che formai crede i viventi
Per tegnirghe su la coa;
No se volta, marchia a pian,
Sta con aria da Sultan.
Ma sentindo che i beconi
A la barba dei antenati
Lo criela: Mo cogioni
Fra lu el dise, questi è fati!
El scomenza a pian pianin
A far scherzì da arlechin.
Per finir po quella scena
Menda al diavolo el sussiego,
Co la coa sferza la schena,
Co le sgrinfe se fa un sbrego;
Fica i denti dove el pol,
E so danno se ghe dol;
Nè podendo mai cucarlo,
Se ghe svegia un tal rabiezzo
Ch'el fa cosse da ligarlo.
El mossato ride un pezzo,
E po el canta in do-re-mi:
Te l'oi dito, schizza? a ti...
Fato el trilo, beca e via;
Ma scorrendo la campagna
El dà drento a una scarpia
E un ragneto se lo magna.
Cussì avemo la lezion
Dal Mossato e dal Lion.