El Funeral
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Al Domino | Edission e fonte ▼ | Uno dei Mile → |
A la Signora Maria Pezzè Pascolato
Quando su le onde intente de cobalto
Sul Canalazzo vedo un funeral
Che passa soto el Ponte de Rialto
(Che 'l par de morte un arco trionfal),
Nè stài se sente più zigar, nè prèmi,
E no rompe el silenzio che 'l rumor
De le onde rote dal tif-taf dei remi,
Strenzer me sento da 'na morsa el cuor!
Davanti vien la Musica in barcona
De damaschi franzai tuta infornia;
Po' vien la cassa soto 'na corona
De fiori e nastri neri sepelia;
E tuto un siolo de gondole nere
A la barca del morto ghe va drio
Coi parenti, e 'l piovan che el Miserere
Vien brontolando fra de lu co Dio.
Per l'aria intanto, sora dei Palazzi,
Lontan se perde de la Banda el son;
E la zente dai Ponti e dai terazzi
Varda tasendo quela pruçission.
Uno domanda: ― «Ciò, ma chi saràlo?»
― «No ti vedi? el xe un sior.» ― «Povaro can!»
― «Si, povarin, (libera nos a malo)!
Ma megio lu che nu'...» ― «Ciò, parla pian!»
E le onde col s'cich-s'ciach soto la prua
Par che le diga: Requie, povarin!
Su voga, barcariol, che anca la tua
Ora no xe lontan; forse viçin...
Mi penso a n'altro funeral, de quando
Che via de casa i gà portà el mio ben...
Ah, fioi mii cari, el xe un dolor ben grando
Cavar sentirse fora el cuor dal sen!
«Quando che sarò morta e sepelia,
Vien a portarme a San Micel un fior!»
Ti me disevi, povara Maria...
E ste parole le gò sempre in cuor.
E intanto digo tra de mi: «La morte,
La xe 'na cosa giusta e natural
Che no la fa parzialità de sorte;
E po', se sa, no la xe miga un mal:
Zoveni e veci, siori e desparai,
Prima de mastegar el pan col miel,
Tuti se va a far tera da bocai
Co la vecia schissona a San Micel!...