Da l'ombra al sol
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| ← El diféto xe nel mánego | Edission e fonte ▼ | El ramo → |
Mi, co' vado a l'ostaría,
perdo tuto l'apetito,
e anca i piati vía traría
perchè gnente i fà pulito:
sorbo el brodo a boca mola
perch'el sa da sbrodeghin,
le minestre me par cola
e le sà da pignatin.
E xe stopa o sióla el lesso,
nè gà el rosto più costruto,
e xe el frito un slimeghésso
imbombà de vecio struto:
scarta e fiápa la saláta
la xe sempre da curár,
e gh'è i tochi de patata
che i xe mezi da pelár.
El bistéch me par caválo
e pò tremo, nel spezzato,
che sia forsi, cussì, in falo,
sbrizzá drento qualche gato:
el formagio xe sgnanféto,
e el salame sarà bon
ma, de porco, ghe scométo,
no'l conosse ch'el parón.
Gh'è l'oposto de sto quà
co' a disnár so' da la Nina:
sempre in punto la me fà
roba fresca e roba fina:
quela sì che xe cusina!...
E po' dopo, a dirla quà,
el viséto de la Nina
l'osto çerto no lo ga.