Cogitazioni
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Confidenze | Edission e fonte ▼ | Meditazione → |
.jpg)
Omnia praeclara tam
difficilia quam rara sunt.
B. Spinoza, Eth. V. in fin.
VEDELA? Quando Oronzo E. Marginati
Gà evaso le so pratiche d'ufizio,
El gà, come sol dirse, in quel servizio
Ministri, senatori e deputati,
El va col pupo, puta caso, ai Prati,
O al Pozzo, salvo ognun, de San Patrizio,
Indove che lo porta el so giudizio,
Libaro nel pensier come ne i ati,
Beato lu ch'el pol andar a spasso
Come ghe par, senza le guardie drio,
Senza che alcun ghe scoccia el contrabasso!
Ma el fazza el conto che, piasendo a Dio,
Mi andasse al Pincio? Sentela el fracasso,
Sentela el putiferio, el scagazzio!
Bravo! A lu ghe per facile! Ma questa
Xe la dificoltà dei casi rari,
Che xe inutile andar co la protesta
Contro la prepotenza dei sicari.
Lori i fa quel che i vol co la so testa,
I me tien come el quatro de denari,
I stampa i libri bianchi e a mi me resta
De sentirme tratar come i somari.
E po' i la tol co' mi! La zente crede
Che mi governa a modo mio sta Corte,
Perchè la verità pochi la vede,
Ma co' le guardie gà serà le porte
Mi benchè sta preson no sia de fede,
So che ghe devo star fin a la morte.
E Dio lo sa sta cotola da festa
Come la pesa e la stola de raso
E sto triregno che i m'ha messo in testa
Che col manego drio diventa un vaso!
El sa che strazzo d'un'idea molesta
Xe de no meter mai più fora el naso,
Tanto, e lo digo a lu, che no me resta
Altra consolazion che nel Travaso.
Ma qualche volta pur, drento mi stesso,
Sento una 'ose che me dise adagio:
«Bepi, ti xe el paron. Va fora adesso!»
Oh Dio! son bon, devoto, onesto e sagio,
Ma, tra i doni che Dio me gà concesso,
Me manca el prenzipal. Manca el coragio!