Cartolina Ilustrada
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Musicomania | Edission e fonte ▼ | Da Nouma Hava → |
Voria anca mi spedir 'na Cartolina
che andasse in pressa e furia al so destin,
par dir, come se dixe, a la mutina,
tuto quelo che a dir no so, poarin.
Ma sì! dove trovarla? in che vetrina?
de qual artista che lavora in fin,
se tante e tante volte no indovina
gnanca l'estro 'l più furbo e svegiarin?
Voria 'na Cartolina che illustrasse
i me più bei pensieri, i sentimenti,
i palpiti del cuor, e tal e qual
dai cari amiçi la se presentasse,
e, come ambassador de boni intenti,
la ghe fasse un augurio par Nadal.
Voraria che a qualchedun la ghe disesse
che no solo a Nadal mi lo ricordo,
seben dal me silenzio lu podesse
ritegnir che a l'afeto fusse sordo.
A qualche altro voria che la portasse
tute le zogie umane, e ancora più;
a tuti, po, un bason che la ghe dasse,
un de quei basi che dal cuor vien su.
Ma mi sta Cartolina che me intendo
trovarla no so bon, nè lo pretendo.
L'ilustrazion che mi vorave in ela
la mando col pensier, l'è assae più bela.