Burasche del cuor
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Quatro Marzo | Edission e fonte ▼ | A Una → |
Oh bel ragio de luna che a pianin,
par le sfese del scuro, a far la spia
ti vien quà drento in camareta mia
dove dorme tranquilo el mio ninin.
Oh palido del çiel caro lumin
che ti vien farme un fià de compagnia,
mentre d'un sogno bruto l'agonia
xe quà che me tormenta sul cusin;
ti che ti vien da l'alto, là dal cielo
dove de tuti scrito xe 'l destin,
dimelo ti: xe forse al mio putelo
preparà qualche splendido avenir,
o invece, come mi, anca lu, bambin,
ghe tocarà voler, sperar, sofrir?
Se purtropo un destin compagno al mio
ghe fusse dal so nàssar decretà,
e, come mi, anca lu, povaro fio,
èssar dovesse tanto sfortunà,
oh bel ragio de luna, torna indrio
e làssime quà solo adolorà,
che, tanto, ormai lo savarà anca Dio
come al sofrir abituà sia za.
Ma dime, intanto, che no ti sa gnente,
che gnanca ti saver no ti lo pol;
lassa che almanco se 'l me cuor za sente
che par mio fio no sluzarà mai sol,
lassa che fin a l'ultima mia ora
par lu possa sperar, sperar ancora.