Brindisi (Riccardo Selvatico)
Jump to navigation
Jump to search
Gh'è certi che trema
Vardandose a torno,
E visto ch'el mondo
4Camina ogni zorno,
Ghe par che Venezia
Un dì cussì bela,
Un poco a la volta
8Se cambia anca ela.
Mincioni, mincioni,
Lassè che lo diga;
Venezia no cambia
12Per quanto che i ziga.
Xe andada in malora
La cale de l'Oca;
Ma el so Canalazzo,
16Perdio, chi lo toca?
Xe andai in so malora
Festini e ridoti,
I salti, le sagre,
20Le forze, i casoti:
Va ben, ma gh'è sempre
La nostra Regata,
Gh'è sempre la festa
24Che gnente ghe impata.
Velada, paruca,
Capelo a rafiol
Xe morti e sepolti;
28Ma gh'è el barcariol!
E fin che sta razza
De brazzi e polmoni,
De omeni tressi,
32Sbragioni ma boni,
In fin che sta razza,
Ripeto, xe quela,
Venezia no cambia,
36Venezia xe bela!