Botega vecia

by Vittorio Vitturi

3 Botega vecia Strade e vicoli Orassion de una mama I vestiti de le done Vittorio Vitturi 1907 XX Soneti veronese

Indice:Strade e vicoli.djvu

Vittorio Vitturi ―  Strade e vicoli

Botega vecia

1907

Edission original:	Vittorio Vitturi, Strade e vicoli, Rime veronesi, Verona, Fratelli Drucker editori, 1907
Fonte:	Indice:Strade e vicoli.djvu

←  Orassion de una mama

Edission e fonte ▼

I vestiti de le done  →

BOTEGA VECIA

     Qua, rente a casa mia, gh’è un ferareto,^[1]
Che fa su seradure^[2] e masenini;^[3]
Da trent’ani le lì, solo soleto,
E no ’l fa tre parole co i viçini.

     In sta botega nera, in sto buseto,
Gh'è pochi ordegni, tropo pochetini!
Ma lu el se inzegna, ma lu el g’à el segreto
De far de i lavoreti soprafini.

     Quando passo da lu me fermo spesso
A guardarlo a limar e a sbatociar;^[4]
E penso con piaser, ve lo confesso,

     A i tempi de quei maghi del lavoro
Che i stava in sti buseti a fabricar
Cose che adesso i paga a peso d’oro!

---

Note

1. [p. 100]Ferareto: fabbro-ferraio
2. [p. 100]seradure: serrature
3. [p. 100]masenini: macinini da caffè
4. [p. 100]sbatociar: battere il martello.