Arringa sul Decreto di Abolizione de' Frati/05
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← IV | Edission e fonte ▼ | VI → |
Dopo quele do’ Legi del Sovran
Consegio, e altre d’un egual tenor,
3(Che de passagio mi torò per man)
Se ghe ne fa in Pregai con mio stupor
Del mile siecento cinque ussir
6Una, come dal so Legislator.
Caro sior Segretario, compatir
Me dovè, se vorìa la spiegazion
9De quelo che no arivo a ben capir:
Vorìa che me disessi la rason
Perchè in Senato, e no in Consegio, alora
12Sia stada fata sta Legislazion?
Quando el Consegio tute le altre ancora
L’aveva fato; questa come mai
15Dal Senato in quel dì saltela fora?
O che l’aveva facoltà el Pregai
De far sta Lege, o no. Fora de qua
18No gh’anderè senza incontrar dei guai.
Diseu de no? Con qual autorità
Donca l’a ’l fata? Me diseu de sì?
21Donca me provarè sta facoltà
Quando el l’à avuda, e provarè da chi;
Perchè, sentime ben, dove che ariva
24Tuta la forza e quel che intendo mi:
Pianto un principio. La Legislativa
Podestà la risiede nel Comun,
27Secondo la Real Costitutiva
Forma de sto Governo; onde nissun
Membro pol arogarse quel poder
30Del qual el gode sol co l’è in comun.
Prevedo che dirè, che ò da saver
Che un subalterno in via de Delegato
33In qualche caso el Drito el pol aver
Che de natura xe del Prencipato;
E che tra le altre l’uso de sta vesta
36Xe in Consegio de Diese e nel Senato.
Ve l’acordo; ma co la vostra testa
No me poderè in fazza sostentar
39Che donca sia la conseguenza questa:
Che ’l delegante quando el vien a dar
Al Delegato el so dirito, in parte
42El se vogia de questo despogiar
In modo che formar Statuto o Parte
(Che dir Legislazion sarà lo stesso)
45Tanto del Corpo el sia che de la Parte.
Ma vogio che ve sia tuto concesso;
Sentì ben, mi v’acordo ch’el podesse
48Far sta Lege el Senato; e no comesso
Dal Comun, ma da sè; cioè, che l’avesse
In sè l’autorità de so’ natura,
51Senza che dal Comun el dipendesse.
Ma con tuta la vostra gran Scritura,
Quando vogiè risolverme sto obieto
54No so se vu farè bona figura:
El gius legislativo l’è un perfeto
Drito Sovran che pol liberamente
57Far ogni Lege, nè l’è mai costreto
A render conto de la propria mente;
Atqui el Senato in quel famoso Bando
60L’à pronunzià legislativamente;
Donca ne vien, che sto Dirito usando,
Sto gius Legislativo in lu risiede.
63Co ’l silogismo è in forma, ve domando
Qual diferenza in prima che se vede
Tra el Senato e ’l Consegio? e po vorìa
66Saver da vu da dove che procede
Che rivolto el Senato ancuo el se sia
Al Mazor Serenissimo Consegio
69Per poder despogiar la Fraterìa?
Perchè ricorer a l’Augusto Segio
Del Prencipato a consultar l’oracolo
72Co la medema idea e col vanegio
De voler meter man nel Tabernacolo,
Onde, alterando el sentimento vero
75A le Legi, pretender el miracolo
De preservar unito, ileso e intiero
Un felice e sicuro vassalagio
78A l’interesse e gloria de l’Impero,
Che xe quel lume e cussì vivo ragio
De la Rason de Stato, che conduse
81El Prencipato al publico vantagio?
Queste le chiamo idee vaste e confuse
De chi pur tropo adopera gran forza
84Perchè le sia tra nu sparse e difuse;
Ma l’argomento qua me se rinforza.