Arringa sul Decreto di Abolizione de' Frati/02
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← I | Edission e fonte ▼ | III → |
Per defenir la Massima de Stato
Convien prima de tuto intender ben
3Cosa sia Suditanza e Principato.
L’idea de Suditanza in nu la vien
Mossa da quela tal popolazion
6Che volontaria la se impone un fren
De Statuti e de Legi, e in streta union,
Soto un solo o più capi regolada,
9La forma da so’ posta una Nazion;
E da quel’altra idea xe in mi svegiada
De chi à la soma de le Legi in man
12Con giusta economia depositada;
Che dove no gh’è un despota o un tiran,
Tanto al Sovran el popolo è sogeto
15Quanto a le Legi è sudito el Sovran.
Da sto principio natural e schieto
Chiaramente s’afazza el gran mistero
18De la Rason de Stato a l’inteleto.
Rason de Stato xe quel fermo e vero
Nodo che unisse in forma inseparabile
21L’interesse a la gloria de l’Impero;
Dal che per deduzion certa inegabile
Soda felicità ghe ne deriva
24Al vassalagio, e sicurezza stabile.
Da massima sì grande e cussì viva,
E che passada in nu d’età in età
27La regnava in Senato e la fioriva,
Con sorpresa d’ognun da poco in qua,
E con privato e con publico dano
30(Nè saverìa el perchè) s’à declinà.
E quelo che radopia in mi l’afano
Xe, che nu semo opressi da un sopor
33Che no ne lassa andar fora d’ingano.
Ah che la Religion senza rossor,
In quel che se consulta e se decreta,
36La sia tolta de mira, me fa oror!
E che a mente serena e a mente quieta
Ogni publico afar tratar se possa
39Che direto no sia verso la meta?
Questa xe stada quel’orenda scossa
Che Republiche, Stati, Imperi, Regni
42À roversà ne la più fonda fossa.
Pur tropo ghe n’avemo certi i segni
Dai rimasugli e dai grandiosi avanzi,
45Tuti memorie dei Divini sdegni!
Favola no la xe, no i xe romanzi,
Parla la Sacra e la Profana Storia...
48Ma che serve che più m’inoltra e avanzi?
Richiamando ste cose a la memoria,
O imagini de calda fantasia,
51O artifizj i credè d’arte Oratoria;
Donca perchè con ordene el ve sia
Posto in chiaro sto afar, a parte a parte
54Feghimo un poco su la notomìa;
E procedendo, al lume de le carte
Confronteremo, per intender megio,
57Sti ultimi Decreti co la Parte.
Se domanda se nel Mazor Consegio
L’intiera podestà de la Republica
60Risieda, se dal Sovran Colegio
Tute le Legi là se forma e publica?
Dopo de che, perchè de le Man-morte
63S’à voludo alterar la mente publica?
Mi no andarò per vie indirete e storte
Oponendome a ste mostruose e nove
66Regolazion; che drento de ste Porte
Xe un delito el mentir. Vegno a le prove.