Arringa sul Decreto di Abolizione de' Frati/01
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← PROEMIO | Edission e fonte ▼ | II → |
Prima d’entrar ne la materia, son
In una indispensabile e precisa
3Necessità de domandar perdon,
Se portando anca mi quela divisa
Scolpìda in fronte, e impressa nel mio peto,
6Che da sta stola no à da andar divisa,
Ardisso comparir ancuo al cospeto
De questo ecelentissimo Senato
9Per tratar d’un gravissimo sogeto,
Che vol sui mii principj e sul mio dato,
Che abia a Vostre Zelenze a domandar
12Cossa le intende per Razon de Stato.
Mi no son qua a far pompa, nè a vantar
L’erudizion de quei che à lassà scriti
15I moltissimi modi de pensar
Sul gran ponto dei Publici Diriti,
E che i Prencipi ancuo tuti à impegnà
18A publicar tanti diversi Editi.
A mi par che i confini abia passà
La Republica sola nel Politico
21Fra tuti quei de la Cristianità;
Nè se diga che mi sia metafisico,
E in ste materie tropo rigorista
24Se nel so’ centro ancuo la guardo e critico;
Che essendo afato compilada e mista,
A formarghene idea corispondente
27Ponderarla convien per ogni vista.
Se dise tuto el dì comunemente:
Massima, o sia Razon de Stato; e questo
30Xe quelo che dal volgo ognor se sente;
El qual, senza curarsene del resto,
De le sì vaste idee de sta parola
33Nol ga la tessitura nè l’inesto.
Quelo che me conforta e me consola
Xe che parlo a maestri del mestier
36Da ognun dei quali posso prender scola.
Pur tropo mi conosso che ’l poder
Da mi solo no go nel gran cimento
39Al fin che me propono de otener;
Ma pur in mi gh’è un tal presentimento
Ch’el Ciel me fazza strada ai vostri cuori,
42Che son pien de lusinga e d’ardimento.
Mi no vaghegio premj, aplausi, onori;
Sola d’un Citadin degna mercede
45Xe el ben de la so’ Patria e i so’ sudori.
Sto sagro, augusto logo, ove risiede
La Libertà, un non so che m’infonde
48Più d’ogni altro, d’ardir, de zelo e fede,
Che ricercando ne le più profonde
Caligini del Caso, o sia Destin,
51Trovo che l’omo spesso se confonde
Tra la combinazion, che pol divin
Voler unire in pena d’una tal
54Qual pretesa d’alzarse oltre el confin
Presento ai sensi; e ne vien che preval
Quel eror che a le Cause secondarie
57Tuto s’atribuisse el ben e ’l mal;
E da qua nasse quele tante varie
Mutazion danose de pareri
60A le massime e legi statutarie.
Su sti principj cussì sodi e veri
E sì ben radicadi in sto Consesso,
63De sviluparghe tuti i mii pensieri
Vostre Zelenze me permeta adesso.