Aniversario
|
Edission original: |
Umberto Spanio, Un toco de vita veneziana, Poesie in dialeto de Grilo, Venezia, Tipografia Antonelli, 1890 |
|
Fonte: |
Indice:Un toco de vita veneziana, Venezia, Antonelli, 1890.pdf |
| ← Mormorazion | Edission e fonte ▼ | Diagnosi diferenzial → |
ANIVERSARIO
No la patisse più, povera nona,
Per çerto in Paradiso la xe andada;
La gera, me ricordo, cussì bona,
Cussì calma a la morte e rassegnada.
Come ancuo (proprio el dì de la Madona!)
Su quel leto la gera destirada;
No la gavea più fià; da una corona
De parenti la gera çircondada.
Ah sempre, sempre qua la go scolpia:
Sora el peto la stola, sui zenoci
El crocifisso; a dir la go sentia:
«Preghè el Signor per mi che 'l me perdona»
No la ga più parlà, per sempre i oci
La gaveva serà, povera nona!