Alla mia Mecenate
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Dialogo tra Parona, Camariera, e Papagà | Edission e fonte ▼ |
Ormai condotti al termine
Xe i capriziosi opuscoli,
E novellette, e apologhi
Diversi ho dito su....
Timor d'esser incomodo
No ha fatto dir de più.
Prima de darli al pubblico
M'ha piasso far da chimico,
E tutto l'amarotico
Dal dolce ho separà;
Apena qualche scrupolo
De quel ghe n'è restà.
Non pago dell'analisi
Le ho dade a un altro pratico
Che fin drento alla meola
Le ha tolte a esaminar:
In scritto ho avudo el placet...
Fatte le go stampar.
No parlo a zente stolida
Ch'el farlo saria inutile,
Se al più posso rimeterghe
Un toco de polmon;
Parlo a chi ga el so merito,
Nel dar torto, o rason.
El poco de amarotico,
Che torna indispensabile,
E che de qualche apologo
Anzi deventa el sal,
A chi, se non ai stolidi
Porlo far dir del mal?
Seguace de Democrito
El mio lettor desidero
Da pregiudizj libero,
Nè all'ira soggiogà;
Per quel che copia Eraclito
Sto libro mio no fa.
Le donne che per solito
Onora sti mii opuscoli
No mostri gnessun palpito
No spanda mal umor,
Che questi za insidiandoghe
No va l'adorator.
Sti sdegni miserabili,
E ste dubbiezze inutili
Sia pur de quelle rancide,
Che ancuo cercando va,
Amanti per limosina
Amor per carità!
I sia delle petegole
Che sempre incomodissime,
De qua, e de là le scotola
Donando el so parer;
Ch' essendo Cenerentole
Se tol dal sa fogher.
I sia de quelle stupide,
Che crede d'esser Veneri,
E che ai so pie le immagina
El mondo incadenà,
Quel mondo che un ridicole
Eterno ghe ne fa.
Oh vu che prima reputo
Tra tante che ga spirito,
E che a ste inezie l'unico
Alto ornamento dà,
Se tanto le ve comoda.
Quanto l'ave mostrà.
Fatta novella amazone
Ve piasa de difenderle,
E vinzarè no dubito
Solo col dir cussì,
Abbie creanza stupidi,
Che le difendo mì.
.jpg)