Ai putei triestini
O fioi2 beati, che godè Trieste
Nei giorni dela sua liberazion
E no gavè provado le tempeste,
Le infamie, el disonor de l'opression,
Pensè che sacrifizi e quante teste
Ga costado la nostra redenzion,
E benedì, per i passadi afani,
La bela sorte d'esser italiani!
O fioi, che vivarè liberi e forti
Nel regno de giustizia e libertà,
Savè che i noni xe vissudi e morti
Col santo sogno de italianità;
Savè quante ingiustizie e quanti torti
Pativa in gioventù i vostri papà,
E tramandè ai nevodi3 più lontani
El giusto vanto d'esser italiani!
Fioi, che vedè da la matina a sera
Sventolar su Trieste el tricolor,
Ricordeve la forca zala e nera,
I martiri de Trento, de Belfior,
Sauro, Oberdàn!... Giurè su la bandiera,
Pegno de fede, de speranza e amor,
Che no soportarè mai più tirani,
Mostrando al mondo d'esser italiani!
O fioi, che studiarè la patria storia,
Le vite dei eroi de libertà,
Adesso che godè la gran vitoria
Che za Dante e Mazzini ga sognà,
Basè4 le bele pagine de gloria,
I nomi sacri a l'imortalità
E, per i nostri Geni sovrumani,
Mostrève5 degni d'esser italiani!
- Note