A la Posta Sucursal
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Una bela Data | Edission e fonte ▼ | La Manon → |
Darente a casa mia, che no xe mia,
ghe xe una de le tante Sucursal
che, de la Posta, el capo principal,
ga volesto che sparpagnae ghe sia.
Fin quà no gh'è da dir gnente de mal,
che, senza de sti Ufizi, dovaria
la zente còrar chissà quanti mia,
se la dovesse andar sempre al Central.
El mal, se go da essarve sinçero
xe quel che in logo d'essarghe impiegati,
i gabia messo tante bele tose.
Se sa; la calamita tira el fero,
e quando se va là par le so cose
se resta insiminii come i distrati.
Un zorno che gaveva da impostar
'na letara, me par co bezzi drento,
ghe gera là al sportelo un bel portento
de tosa co do ocioni da incantar.
Siccome che la gera drio timbrar
no me ricordo più che documento
cussì go aprofità de quel momento
e me l'ò messa tuta a contemplar.
Rivà l mio turno, co la so voseta
che me pareva un'arpa, la me fa:
Chi spedisse? ― Oh siestu benedeta,
che m'ò sentio talmente impapinà
e inebetio quel tanto, che, cussì
ghe go risposto: Ciò... spedisso mi!