A Toni Fradeletto

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
XL. A Toni Fradeletto
1892
←  XXXIX. Al Muniçipio Edission e fonte ▼ XLI. El diavolo de paradiso  →
[p. 50 modifica]

Co saremo do veci carghi d'ani,
Toni, che serietà che gaveremo.
De gnoca gravità se imbotiremo
Co saremo do veci ombrosi e strani.

Zigaremo ogni dì de logo in logo
Contro la zoventù piena de fogo.

E vantaremo el bel tempo passà,
Seri e imbotii de gnoca gravità.

[p. 51 modifica]


2

Saremo tuti do do brontoloni,
Do Tódari de quei de far pietà.
E che tirae, che razza de sermoni,
Dale boche sdentae ne piovarà.

Diremo: mata xe la zoventù...
No gh'è più religion, no gh'è virtù.

Diremo: el vizio fa per tuto scuola,
Tossindo e tabacando a ogni parola.

3

Cussì fa i veci, e, gnanca dirla, Toni,
Faremo tuti do çerto cussì.
Ma co saremo malandai e noni,
Lontani tanto da sti cari dì,

No pensaremo ai zorni benedeti,
Che zoveni anca nu pieni de afeti,

Pieni de fogo, de alegria e speranza,
Se rideva dei veci a crepapanza.