A 'na traditora
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Le Çenari | Edission e fonte ▼ | L'Estrazion de 'Loto → |
Te ricordestu quando ti disevi:
Piero, so' tuta tua!
E, basandome, al cuor ti me strenzevi;
Ma, te gò conossua...
E mi, fora de mi, te rispondeva:
Nina, tesoro mio!
Povero macaron, che in ti credeva
Come se crede in Dio!
Adesso visto gò che tuta mia
(Dei altri) che ti xe!
Ma, oramai, fra mi e ti, la xe fenìa,
Cara la mia... Bebè!
La mia cara fintona, la mia zogia,
L'idolo del mio cuor...
Se soto ti me capiti, sa, bogia,
Ti sentirà co amor!
Co 'n ago fin, sul to ritrato i neri
Oci te gò sponcia;
I gera furbi e bei come quei veri,
E su ghe gò spuà...
Le to letare, piene de promesse,
Tanto aspetae da mi,
Le gò butae in-t'el fogo, e se podesse,
Te brusaria anca ti.
I to libri, i to fiori e i to cavei
Butai li gò in Canal...
No vogio più de ti gnanca i to anei,
I me farave mal.
Me gò lavà fin co l'asèo la boca
Perchè, ciò, chi lo sa
Che i to basi che i sporca dove i toca
No i me gabia sporcà?
Ti, ti credi che tisico deventa
E no possa magnar:
Magno do chili al zorno de polenta,
E, me torno a ingrassar...
Oh, se podesse in-t'i Pozzi butarte
Del Palazzo Ducal,
O dei Marani in-t'el Canal negarte,
O impicarte a un faral...
Farte passar el Ponte dei Sospiri
In mezo ai rasaori...
Altro che andar de note coi to ziri
A far la cazza ai... siori!
Va là, va pur in Piazza, o in Frezzaria
De note a spassizar;
Che 'l mocolo per ti, mi, cara mia,
No lo vogio portar.