Venezia (Gian Giacomo Mazzolà)
|
Edission original: |
Jacopo Mattielli, Della vita e degli scritti di Gian Giacomo Mazzolà, Padova, Sicca, 1846 |
|
Fonte: |
Indice:Mattielli - Della vita e degli scritti di Gian Giacomo Mazzolà, Padova, Sicca, 1846.pdf |
| Edission e fonte ▼ |
VENEZIA
Una volta ghe giera una donzela
Parona de moltissime città,
E, benchè vechia antiga, tanto bela,
Che la compagna al mondo no se dà:
De una saviezza che no gha sorela,
D’una prudenza e d’una nobiltà,
Che i primi gran Monarchi la stimava;
E i so popoli tutti l’adorava.
Ma cascada co ’l tempo in difetini,
La xe dopo passada al gran difeto
De consumar in lusso quei zecchini
Che doveva servir a un altro ogeto:
Ha scomenzà a lagnarse i citadini,
Savendo che l’erario giera neto,
Quantunque che fra dazj e imposizion
Ogni mese i ghe dava un bel milion.
Ma pur con tuto ciò i se contentava,
Perchè i viveva quieti senza guera;
Anzi tuti d’acordo i protestava,
Che zente più felice no ghe giera:
De fato con clemenza la i tratava,
E per lori spirava primavera;
Se da Provenza no se leva un vento
Che tutti l’impenisse de spavento.
Un fio de una Republica nascente
Sta bella puta pensa de violar;
Un omo de un esterno conveniente,
Ma un cuor che de pezor no se pol dar:
El se ghe acosta, ma co tanta zente,
Che farave un Sanson ispiritar;
Ma furbo come ’l xe, pien de malizia,
El finze de tratarla in amicizia.
Cossa mo fà sta povera creatura,
Inteso sto imperioso zarlatan?
Da gnoca la ghe crede a tal mesura,
Che in bota del so cuor la ’l fà Sovran;
E sempre più sto dreto l’assecura,
Con modi che pareva da Cristian,
Che in gnente afato el la molestaria,
Ma che anzi più signora el la faria.
Intanto co un esercito infinito
El magna e’ l beve sempre a le so spale,
Finchè la bona fiola tuto ha frito,
Dandoghe infin l’arzento co le pale;
Ma st’Omo che xe stà sempre pulito,
Vedendo che la resta spogia in cale,
L’ha fato in bota l’ato de vertù
De farla d’altri per salvarse lu.
Co la s’ha visto tanto vilipesa,
La ghe dise a sto degno capital:
Oh questa pò no s’averà più intesa,
Che se concambia el ben co tanto mal.
Ma lu non se fa gnente de sorpresa,
E con la so franchezza natural
El se scusa disendoghe: Per dio!
Sto desegno, sorela, no xe mio.
Ah can, ah traditor, sassin indegno!
Sogiunge la gramazza inviperia;
Dopo che ti m’ha tolto onor e regno,
Ancora ti gha cuor de darme via?
Ma lu co tuta flema e senza sdegno
Ghe risponde: Mo cara, vita mia,
Vedo i to ossi, che no so che farne,
Dopo che ho rosegà tuta la carne.
Chi mai po l’ha acquistada? Un comprador
Che un dì ghe meterà la carne atorno,
E che la vestirà co più splendor;
Nè xe molto lontan sto fausto zorno....
Voleu saver chi ’l xe? ’L xe un gran Signor,
Un invitto Monarca, tuto adorno
D’ogni virtù e d’ogni cortesia,
Seu contenti...? Anca mi. — Bondì, sioria.