Un fogio t'ho mandà, Betina cara
|
Edission original: |
Giovanni Battista Bada, Opere in versi edite e inedite in vernacolo familiar Venezian, Tomo IV, Venezia, Adolfo Cesare, 1800 |
|
Fonte: |
| Edission e fonte ▼ |
SONETO.
Un fogio t’ho mandà, Betina cara,
Nel qual mi te parlava del’amor
Che porto al to museto, e del’ardor
4Che m’ha impizzà la to belezza rara.
Ma ti cagnazza ala mia pena amara,
Mentre che mi tuto te dago el cuor,
D’una letera toa darme l’onor
8Gnanca ti vol? oh ti xe pur avara!
Un fogio too lo pagheria un zechin,
E lo conserverave, tel protesto,
11Come una zogia sempre nel borsin.
Se contentar no ti me vol mo in questo
Tornime donca el mio che poverin
14Farò ch’el serva per furbirme el cesto.