Trenodia
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Me digo de no | Edission e fonte ▼ | Leggendo il Vangelo → |
.jpg)
E i gà dito — petèvelo paron! —
Mi go resposto ― no, che non son degno! —
Ma lori, i xe vegnui con la rason
Che questa xe la volontà de Dio
E de la so precisa votazion
Po', sti martufi, i me vegniva drio,
Con un monte de ciacole in latin
E cussì Bepi xe deventà Pio.
E po' vestido in gringola a la fin,
Con le cotole bianche e con la stola,
Son stà messo in preson come un sassin.
Mo buzarai ― salvando la parola —
Mo no podeva nominar l'istesso
O Goti, o Svampa o el cardinal Rampola?
Povaro Bepi mio, pensa che adesso
Te podaressi lavorarte un goto
Da Giacomuzzi in cale Valaresso
E andar al Lio la sera a far del moto,
Spuar in acqua senza sugizion,
Zogar el to tresete e dar capoto!
E invece a la to porta ghè un pianton
Che, se te fa una petola, i la trova
E i la manda a la Santa Inquisizion;
E in zardin, col bon tempo e con la piova,
Sempre te va con una guardia arente
E un svizaro da pope e un altro a prova;
Che se per caso te scapasse gnente,
I portaria la nova e le gazete
Come se fusse un dogma indegnamente!
Povaro Bepi e no i te lassa in quiete,
Che questo vol palanche e quelo schei
E tuti quanti insieme i vol monete!
Adesso provarò coi guibilei,
Mo con sta bavesela buzarona
No me dà reta più gnanca i putei.
Son qua, compagno al campaner che sona
Perchè i fedeli porta bezzi ai preti,
Ma i xe sordi sti fioi... de bona dona,
E co ghe digo — semo povareti!
Preghemo Dio che ilumina el governo!
I me porta dei versi e dei soneti
Che Dio li maledissa in sempiterno!