Supplica dei Preti al Patriarca
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| Edission e fonte ▼ |
Tuti i poveri Preti Veneziani,
In Sinodo ridoti al Magazen,
Al so novo Prelato i propri afani
4D’esponer con modestia i stima ben:
Monsignor, nu in ancuo stemo da cani,
Nui come Giobi colegai sul fen,
Perchè la Messa in sti presenti ani
8No basta a le buele a farghe el pien;
Se parlava de cresserne la tassa,
E darne almanco la paga dei Sbiri,
11Ma s’à po dito, ch’anca questa è massa;
Cavène donca vu da sti martìri,
E no fe’ che l’amor vostro ne lassa
14Viver più tempo in gemiti e sospiri;
O fenì sti deliri
Col farne come Santi venerar
17Martorizai da fame su l’Altar.