Siè cantè sora la villa/Per l'anno 1736
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1735 | Edission e fonte ▼ | Per l'anno 1748 → |
Son vegnù vecchio e griso como son
No ho mai pì visto tanta zente, e tal
El Vendrio Gnoccolar a sta Fonzion;
In fatti l'è ben n'anno che và mal,
Nebbia, Guerre, Foraggi e pì de cento
Desgrazie le n'ha monto el cavedal;
Onde savio, fradei, quel che an mi sento?
Che no se vergognem st'anno a portar
Per na bina de pan maggari el brento
Zà i dis che ne se sporca ne collar,
Ne spada, ne pelucca, ne zippon
A far el so interesso per magnar.
Parlo così da poro ognoranton,
Perchè so che 'l bosogno quarche volta
Fà buttar la vergogna in t'un canton:
Diga pur pì d'un chigo che me scolta
Quanto ghe sarea cara na binetta,
O na Fettina calda de stravolta.
Laghem pur a cà soa la mascharetta
C'hemo da sar a procurar per nù,
E no l'è l'anno da spartir la Fetta.
Savio che Messer Giove st'anno an lù,
L'hà mandà dal Gastaldo el sò garzon
A pregarlo del pan alman per dù.
El vol anzi che so Compar Pluton
St'anno in persona ai Gnocchi el faga fogo
Per farghe guadagnar da Collation:
An Saturno a Sanzen s'hà cattà logo
Vecchio como che l'è, la man el vol
Col so grombial denanzi a far el cogo:
E l'hà menà con lù Nattun so fiol,
El ghà fatto al piron guzzar i denti
Per manestrar i Gnocchi dal parol.
Anca Ser Eolo l'hà ordinà ai so venti
Che per ancò i ghe suga la Camisa
Per anar a Sanzen coi so parenti.
Vezio po là Zunon Vecchiazza grisa
In sul palco dei Gnocchi la farina
Mei de tante Massare la tamisa?
Gnan Venero perdina sta mattina
No l'hà buttà via tempo a farse bella
Per paura de perdro la so bina.
Gne l'hà vergogna con la pignatella
In camisa al bogon el so putel
Far nar intorno, e menar l'orbo an ella.
Febo col bordo d'oro sul capel
E la pelucca bionda spolverà
St'anno el se degna nar sù l'asenel
Con la so banderiola in cavalcà;
Ch'el fiol d'un ortolan el ghà prometto
Che dei gnocchi e del pan ghe toccarà.
Cerero la vegnea, ma per rispetto
De farde vedro a tutti sì nebbià
Pianze la so desgrazia e la stà in letto.
Vezlo colù lá in mezzo intabarrà
Ch'el par un galantomo ai zerli intorno?
Quel è Mercurio, 'l robba da famà.
Diana alman tre ore innanzi zorno
L'hà battù dal pistor a desmessiarlo
E la ghà giutà a mettro el pan in forno.
Vezo pò Marte: altro de lù no parlo,
Se no che l'è na razza sfondradona,
Se stesse a mi bosognarea piccarlo.
El vezio ades ch'el sente a sonar nona
A buttarse da dosso e spade e stocchi
Per anarse a cavar la segradona?
Vezilo là che 'l se manestra i gnocchi
In tel scudo sto boja, ladro, arpìa
E a taola el vol sentarse coi Pittocchi.
Bacco si ben l'è cotto, no 'l vol mia
St'anno far tanti arlani col boccal,
E menar tanti matti all'ostaria.
Quaresima el vol far de Carneval:
E 'l ghe tagia le gambe in tel pì bel:
(Se fes tutti così no i farea mal)
L'hà fatto vegner Teti col Battel
Con la scusa de veder el Bogon,
Per battezar el brento a questo, e quel.
Ha tirà zoppegando col baston
Anca Vulcan la gola dei panetti
E i so Famegi insieme col patron.
E finalmentre cargo de Sonetti
Polo col conto in man del Stampadoro
El vol el so formai, pan, e fiaschetti
Pieni de Marzemin che l'è megioro
Dell'acqua del Parnasso, o de Pocrena
Aqua che i matti compra a peso d'oro.
Sento che se me vol seccar la vena,
E delle lappe ho ditto sù abastanza,
E matta è quella Musa che me mena.
Voi però dir, Fradei, della Bondanza
Che da so posta a goderla ne invida
Pan, vin, formai, bottero, che ghe 'n vanza.
Giovo, Polo, Nattun tutti n'aìda
I Dei col bon assempio a nar intorno
Per nar daspò a tassiar tutti a desfida.
Che i diga pur i matti che dal corno
Della Baila de Giovo ven bondanza
Che del so pan ne d'ho mai visto in forno.
Che fe volemo star su la speranza
Che Giovo udesse el corno ancò o doman
Per doa negun s'impienerea la panza.
Ma sta bondanza de sta robba e pan
Dalle man generose tutto ven
Del pì degno RETTOR TOGNO GRIMAN.
Trombe, tamburi, e sbarri molto ben
Tutto ne invida, e tutto dis che andemo
A vedro in piazza, a godro zo a Sanzen.
La pezzeta dal muso via buttemo
Collaroni, pelucche, e spade, st'anno
Tutti col bisognin a un pal zà semo,
E chi hà vergogna, e resta in drè so danno.
.jpg)