Siè cantè sora la villa/Per l'anno 1735
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1733 | Edission e fonte ▼ | Per l'anno 1736 → |
SEgnor, che causa si de sta legrìa,
E si quel Sol che tutti ancò ne indora
Compatì sto Villan no 'l cazzè via
Co 'l dirghe vate scondi, o và laora;
Parlo così, perchè la scienzia mia
No l'ha podesto deventar megiora
E se no son Poeta Arcado, an mì
Son Veroneso como i altri, e an pì.
E vù Sior Polo, e Muse quante sì
Ve prego deme man in sta facenda,
E deme del megioro che ghavì
Azzò sotto sta carga no me renda;
Ma cantando la grolia de sto dì
Fè che agnuno el me dir solito intenda
E no i diga: sto matto ancò el zavaria
O gha levà el cervel la Gnoccolaria.
Como che no ghè mai cossa a sto mondo
Che certo no la g'habbia el so perchè
Tanti cosìta i và pescando al sondo
Che i catta el cao de tante antighitè;
An mi porro Villan sibben son tondo
A sta curiosità vogio anar dré,
E vedro se poesse un po cattar
L'origine del Vendri Gnoccolar.
Ma ne vì miga far como sa quei
Che lagando el cervel in le antigagie,
I spende e i spande in sassi a far Musei
E i baratta i Cecchini in le medagie,
E no i sa gnanca como fà i Puttei
Che i se innamora in le belle bagagie:
Ma sti Dottori com' pì brutte giè
Piassè i le stima, e i le paga piassè.
Se alman quan i hà sunà sti pattaconi
E ste so lume eterne, e ste rattare
Ste pree, sti brutti musi, ste scrizioni,
Che tante volte le ghe costa care,
I saesse che farde sti Patroni,
E i podes quando i vol tirar a mare
In t'un bisogno quel che le ghe costa;
Ma i trà via el molo per vanzar la grosta.
Che'l sia un Fabio, un Neron, un Bò, na Vacca,
Che la sia na Grippina, o na Costanza
A ste Tognessarie no penso n'acca;
Cerco pì tosto como sia sta usanza
De godre un zorno tanta robba a macca;
E magnar ancò i Gnocchi a crepapanza
Lagando pur che in fal Meropa voja
Mazzar so fiol, e che sia Chile in Troja.
Za chigo ognun del Vendri Gnoccolar
Savarà la Fonzion che ancò se fà,
Veze la robba a motte intorno a nar,
Che a macca se despensa a na Contrà,
L'è n'aqua zà del nostro Driaco mar,
E del GRIMANI l'è generosità,
Ma forsi pochi, e negun forsi gh'è
De' Cittadini che sappa el perchè.
E quà boson che faga da antigario
Col revangar i secoli passè
E como se sol dir faga el diario
Del mondo vecchio, e delle prime etè,
Se fallarò el fallar sarà ordenario
De chi vol renovar le antighitè:
Gne codici, gne sassi no gh'è pì,
Che possa dir dei Gnocchi l'è così.
Al tempo antigo m'ha contà me Nona
El governo no l'era como adesso;
Fussela Zucca, o pur na testa bona
El dominio al mazoro era concesso,
E cosìta agni razza sfondradona
Prencipo deventava; e chigo spesso
Se sava e se desfava; onde la terra
Mal regolà d'agn'or viveva in guerra.
Altro no se sentea per le contrade
Che strepiti, sussuri, e che costioni
Mal seguri s'andava per le strade,
Bulli postè per tutto su i cantoni
Ballestre da per tutto targhe, e spade
E in aria se vedea spedi e spontoni,
E le Donne e i Puttei fava i so chiassi
Quelle con l'ongie, e questi chi co i sassi.
An Verona a quel tempo era così
Mal governà soggetta a sti malanni,
Chi se ponzea chi le mordea de lì
Gne remedio zovava a tanti danni;
Contrada con contrada notte e dì
A farsela studiava stuzie e inganni,
E massime San Zen ch'era mazora
A tutte l'altre la volea star sora.
Ma el Ciel che a tempo i tribulè consola
A sta nostra Città proveze, e sora
La vol cavar da guai che la dessola,
E la ten schiava, e la butta in malora
Và; ghe dise, Verona, e fate fiola
Del Veneto Senato, e questo implora
Che te voggia cettar, che 'l te governa,
Allor t'havarè pase, e pase eterna.
Così in fatti volendo respirar
Verona, e trarse de sta vita amara
Ressolve sto consegio seguitar
E de darse a Venezia se prepara;
La và, la se ghe dona, e zà dal par
Quella se ghe fà Mare, e Mare cara:
E 'l bontempo, che avem l'è fin dall'ora,
Sia benedetto l'anno, el zorno, e l'ora.
Tolto quella el possesso la se mette
A quietar sti contrasti, e ste costion,
E tegner le contrè, le case nette
Da sti sussuri, e metterghe de bon:
E como Mare a so Figioi promette
Volerghe ben, darghe da Collazion
Azzò che no i se dagha pì de i denti
Ma i staga savj, e i ghe sia obedienti.
E como de ste guerre era Sanzen
Capo, perchè pì numerosa e granda,
A questa pì d'ogn'altra tende ben;
Da Collacion de subito ghe manda:
E sta zente vezendo, che ghe ven
Da bevro, e da magnar, butta da banda
L'arme e 'l verin, e pò piccoli e grandi
De so mare a sentir ven i comandi.
E questa con dolcezza la ghe dise
Cari fioi de San Zen, se sarì boni
E a ste guerre darì le so camise,
Col lagar da na banda ste costioni
Ve vorrò ben, sarì le me raise,
Domandeme favor che si patroni;
Ma buttè via ste vostre targhe e stocchi,
Che agn'anno ve darò da far i gnocchi.
A sto dolce parlar tutta sta zente
Se quieta e ghe promette fedeltà,
Agn'un se ghe fà intorno, agn'un d'arente
Con mille reverenzie se ghe fà,
Agn'uno la ringratia, agn'un se sente
A sto tratto amoroso el cor mudà
E con festa, e con vose alta e giuliva
Viva Venezia i cria, San Marco e Viva.
E como che daspò da bona fiola
L'ha saesto portarse sta contrà
L'ha g'hà mantegnù sempre la parola,
E da criar no l'hà mai pì cattà,
Giusto per sta rason segura e sola
Agn'anno quella da magnar ghe dà
In te sto dì, e da bevro del vin bon,
E da questo è vegnua sta gran Funzion.
Altro de cattar fora mi no bramo,
O Veronesi, a vostra utilità,
Ades saì da qual raise e ramo
Ven quel frutto, che ancò ve ven donà
Per altro se ho fallà, scorno mi chiamo
Che no vì contrastar la verità:
Ho ditto quanto posso, e quanto sò.
Viva el GRIMANI e grazie all'amor sò.
.jpg)