Se presenta una serva
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← El portonier | Edission e fonte ▼ | La baba → |
— Bon iorno, scusi, me ga dito dona
De butiro che qua una serva ocori
— Sentimo fia, de cossa ti xe bona?
— De tuto, mi sa far tuti lavori,
Mi fa camere, mi sa cusinar,
Roba picola mi sa sopressar.
— Benon, e quanto ti pretendi al mese?
— Diese fiorini.
— Dai, no ghe xe mal;
Dime franco, ti ga altre pretese?
Ti ga el moroso?
— Si, ga caporal
A, xe meio mi disi verità,
Ce me vol cussì, ben, ce no mi va!
— No digo niente, mi, go assai piazer
E me piasi sta tua sincerità,
Quando che ti ga fato el tuo dover
Godite in santa pase el tuo soldà.
— Grazie. Me diga sai camere xe?
— Tre sul davanti e sul de drio altre tre.
— Orpo, xe alora sai grando quartier...
— Con tuto ciò semo un poco ristreti.
— E desso ancora mi vorria saver
Se ga fioi pici, po, se ga palcheti?
— Go fioi pici, palcheti e go altro ancora
Ma ti ciapa la porta e va in malora.