Santa Barbara se arma
|
1917
|
|
Edission original: |
Umberto Foà, Nuove rime veneziane di guerra e di pace, Firenze, Libreria Internazionale, 1917 |
|
Fonte: |
| ← La sagra de l'oro | Edission e fonte ▼ | DA L'ADRIATICO A L'IONIO → |
Santa Bàrbara se arma,
la va in Genio o Artiglieria,
l'è per l'una e per l'altra Arma
4santa amada e riverìa.
La xe stada tanti secoli
impalàda su un altar,
quei foresti la rimèscola,
8anca ela vol marciar.
Palma el vecio l'à dipinta
co un bel viso verto e forte,
co del sangue, no co tinta,
12a la vita, no a la morte.
Del martirio co la palma
l'andarà fin in trincea,
l'è più ardente, fiera e calma
16de Minerva, la gran Dea.
La xe Santa e Dio à volesto
che la sia ferma e paziente,
ma però no l'à podesto
20restar là senza far gnente
co xe stada profanàda
la so ciesa preferìa,
co Maria Formosa è stada
24rovinàda e demolìa.
Quela note, per pietà,
co le lagrime nei oci,
el Signor l'à scongiurà,
28reclinando sui zenoci,
che El volesse liberarla,
per partir armada in guera,
per Maria, per vendicarla
32de l'ofesa avuda in Tera.
L'à scoltàda in çielo Dio,
el Signor de la bataglia
generoso à consentio....
36La s'à armà de lanza e maglia
e sul Carso la xe andada,
l'è montada su in Cadore
e i soldài che l'à incontrada
40più contenti vinze e more.
Co sarà finìa la guera
su l'altar la tornarà,
sul so peto ardente e fiera
44'na medàgia brilarà!