Pronostico sul Matrimonio
|
Edission original: |
Luigi Bampo, Miscellanea o trentacinque cose per trentacinque soldi, Treviso, Francesco Andreola, 1828 |
|
Fonte: |
Indice:Bampo - Miscellanea o trentacinque cose per trentacinque soldi, Treviso, Andreola, 1828.pdf |
| ← La Sala | Edission e fonte ▼ | La benedizione della mensa → |
Sentindo che m'aveva da sposar
Vint'ani fa, me santolo Prosdocimo
Me xè vegnù a trovar,
E’l primo complimento che 'l m'à fato
Xe stà questo: se vero è quel che i dise,
Care le me raise,
Vu sè deventà mato. —
Mato? Mi no so vedarghe el perchè. —
Ascoltè una parola, e 'l vedarė.
Metemo per esempio
Che prima de compir le cerimonie
Do lire abiè in scarsela;
No menè gnanca a casa la mugier
Che un da vinti xe tuto el vostro aver;
E la matina drio,
Credemelo, fio caro,
O tuto è andà con dio,
O per gran sorte ve civanza un traro.
In capo ai nove mesi
Co sentirè quel benedeto oà,
Gavarò gusto de saver da vu
Come che l'andarà. —
Finio sto discorseto
Quel bon vechieto me consegna un baso
Sperando za d'averme persuaso.
Basta che diga che go sete fioi
Per far capir cossa che go badá,
E quante volte che go dito ohi
Per no averlo ascoltà.