Poveri omeni!

by Giovanni Battista Bada

3 Poveri omeni! Giovanni Battista Bada XIX Canzonete

Indice:Raccolta di poesie in dialetto veneziano 1845.djvu

Giovanni Battista Bada

Poveri omeni!

XIX secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

Poveri omeni!
     Se fido amor
     Sperè da femene
     4Sè in gran eror.
Tuto el so studio
     Xe d'inzucarve,
     E torse el bagolo
     8Po de burlarve.
Le xe bisbetiche
     Nel so pensier;
     Con ele el merito
     12No serve aver.
Sol per capricio
     Le ve carezza,
     E senza causa
     16Le ve disprezza.
Mile le esagera
     Promesse avanti
     D'amor ecetera
     20Coi so galanti;
E po, stufandose
     De la persona,
     Senza demeriti
     24Le ve abandona.
No è tanto istabile
     Fortuna e mar
     Come la femena
     28Nel so variar.
I sacrifizi
     No serve a gnente,
     Nè mai d'un misero
     32Pietà le sente.
L'ardito, el stolido
     Xe preferio,
     E l'omo docile
     36Vien avilio.
E mi per pratica
     Lo posso dir,
     Nineta barbara,
     40Senza mentir.
Ma con ti inutili
     Xe i mii lamenti;

     Anzi ti giubili
     44Dei mii tormenti,
E ti vol vederme
     Un zorno o l'altro
     Morir da rabia,
     48Crudel, senz'altro.