Zaneto. Oh per carità! In un colpo de man xe fato tuto (a Piero) Piero, avanti, presto, daghe sti do ponti e po' metighe i salvatachi.. (Porge gli stivali a Piero che, prendendoli di malavoglia, se li lascia sfuggire di mano) Ciò, ebete: cossa gastu in quele man?
Piero. I me xe sbrissai...
Zaneto. Varda che a mi no me sbrissa un papin... (Gli misura uno schiaffo — a Pina). E ti, gnancora giustà quela borseta no ti ga?...
Pina. Eh, no go miga la machina sui dei!
Zaneto. Za! Vualtre done no gavè la machina che sula lengua! In malorsega le machine e tute le rode che le ga... (Osservando il vestito di Arturo e raddolcendo subito il tono) Trane, naturalmente, le biciclete che pecà che no le gabiemo anca a Venezia ― xe una stupenda invenzion...
Piero. (a mezza voce) A proposito de prima!
Zaneto. Cossa borbotistu ciò?
Piero. Eh gnente, la gaveva co sto curame che xe cussì duro da lavorar...
Zaneto. El sarà dela stessa roba che xe fata la to testa! (Arturo e Pina ridono, mentre Piero brontola e freme)
