Zaneto. E, adesso, manco ciacole. Tolte su i ordegni, sentite zozo e avanti (ad Arturo) El perdona, salo signor, ma co se ga dei tangari per lavoranti... Vorlo far el piacer de cavarse i stivai?
Arturo. Si, ecco... (eseguisce)
Zaneto. (prendendo gli stivali che l'altro gli porge ed esaminandoli) Ah, roba fina questa! Stivai comilfò! El se li ga un poco sporcai da calçina... Se vede ch'el xe andà adosso a quel mucio de rovinassi che xe là fora... E anca da tute do le bande... Se capisse ch'el ghe xe passà sora più d'una volta...
Arturo. Si, infatti ho passeggiato un po' su e giù..
Zaneto. Bele parte, ah queste? Senza strepiti, senza tanto passagio de zente.... (continuando ad esaminare la scarpa) Oh questa xe un poco descusia!
Piero. (alzando il capo, con intenzione) Sula ponta, forse?
Zaneto. Tasi ti, scalfaroto! (ad Arturo) Comandelo che ghe demo un ponto, prima che le se descusa de più?
Arturo. Si, ma... (volgendo una rapida occhiata alla strada) Sarà una faccenda molto lunga?
